العيال كبرت

فين الشباب سايب مدونه العيال دى ورايحين يكتبوا فى مكان تانى ولا انتم كبرتم وخلاص ماعدش عندكم الوقت علشان تكتبوا ولا ممكن نقول انكم فى ضيافه حبايبنا الحلوين وننزل منادى ينادى عليكوا ونعمل منكم ابطال .انتم مشغولون فى ايه ؟؟؟ الوضع الطبيعى انكم زى اغلب المدونين المصريين بيشتغلوا عند بطال باشا بيعبوا الضل فى قزايز يعنى نوم وش الفجر وصحيان فى العصارى . خلاص بقى اكتبوا لنا حاجه نستفيد منها وتنفثوا عن غضبكم وقرفكم فى المدونه دى .أوالظاهر انكم مشغولين فى اضراب خمسه مايو الفاشل !!!!!

طيب انا اعرف ان اللى يعمل اضراب يكون اساسا بيشتغل ويمتنع عن الشغل لكن انتم بطاله مع سبق الاصرار والترصد طيب هتعملوا اضراب ازاى ؟؟؟

بجد حال البلد وشباب البلد يحزن .ونلاقى تجار السياسه بيلعبوا دلوقتى على ورقه المدونات لان الحكومات واجهزه الامن حست بخطورتها ... وكل واحد منهم عامل نفسه بطل على حساب الغلابه وكل واحد بيقول انه هو اللى خطط لاضراب سته اربعه وانه لما ماشاركش فى اضراب خمسه مايو فشل لانه العقل المفكر والقوه العظمى فى عالم الاضرابات .... ياأخى اتنيل على عينك هو فيه اضرابات تنفع مع العالم بتوع الامن دول . الناس دى مابتفهمش غير لغه القوه والبقاء للأقوى مش للضعفاء المختبئين خلف اجهزه كمبيوتر وفاكرين انهم بيديروا العالم وبيصلحوا الكون وادينا شفنا اسراء المدونه طلعت من عندهم بتقول حقى برقبتى وكل واحد راح عندهم بعثه كام يوم قال انا توبت توبه نصوحه .لا والطامه الكبرى الجماعه بتوع الاخوان قالوا مدام اضراب ابريل آثر فى الحكومه وخلى نظيف جه المحله جرى ووراه الوزرا بتوعه طيب مااحنا نركب الموجه ونتبنى الاضراب اللى بعده !!!! لكن لاتأتى الرياح بما يشتهى اخوانا البعده والاضراب فشل فشلا زريعا لان الناس عارفه ان الامن عنده حساسيه من الاخوان ومدام الاخوان قالوا هنشارك تبقى العمليه هتقلب غم فى الآخر . وبناء عليه كل واحد راح شغله وطنش ام الاضراب وتبرأ من الاخوان وعمايلهم السوده لان العمر مش بعزقه والجماعه بتوع امن الدوله مابيعرفوش يهزروا واذا هزروا فهزارهم تقيل على القلب والقفا وتانى حاجه الاضراب الاخير ده عامل زى ابن الحرام مالوش اهل يعنى لو الواحد طنش مافيش حد هيلومه ولا هيعاتبه وكمان ماحدش عارف ايه اهداف الاضراب التانى ده ولا ايه الطلبات اللى هنطلبها من الدوله علشان نفك الاضراب يعنى بصراحه كده اضراب مالوش طعم ولا ريحه والحمد لله انه فشل علشان الاخوان يعرفوا انهم مايقدروش يحركوا قشه مش يحركوا الشارع المصرى بجلاله قدرة .عموما من هنا بطالب العيال انها ترجع تكتب فى المدونه دى وبلاش خوف لان من خاف هاف وبكل الصدق وحشتنى كتاباتهم خصوصا شمس والجيزاوى