كلام عيال

الفارس

2008-09-02T05:20:00.000-07:00

الفارس

الكل قد اجتمع على أن التغيير قادم وأن استمرار الحال على ماهو عليه ضرب من الخيال . والجميع أصبح يعلم علم اليقين ان هناك مرحله قادمه فى تاريخ مصر ولكننا جميعا لانعلم موعد هذا التغيير هل هو غدا ؟ ام بعد يوم او سنه.. الكل يعلم باننا على ابواب عهد جديد ولكن هذا العهد كيف سيأتى ؟ وكيف سيحدث التغيير . هل هو تغيير سيكون سلميا ام هو تغيير سيكون عنيفا ودمويا . ولو حدث هذا التغيير من سيكون الفارس القادم وهل سيكون من خارج الاضواء ام من داخل البيت وهناك الكثير والكثير من الاسئله التى تشغل بال الكثيرين منا ولقد سألت الكثير من الاصدقاء فى مصر وحتى خارجها فأجمعوا على ان هناك تغير قادم ولكن لاأحد يعرف كيف سيتم ومن سيكون الفارس وهل هو فرد او مجموعه او سيتم بأيدى خارجيه . كل شخص يضع سيناريوا للحدث الجلل وكل فرد يتمنى ان يكون التغيير على هواه وفى صالحه وان يأتى التغيير ليحقق له احلامه.وأنا كفرد من هؤلاء الحالمين او كنقطه فى محيط لى السيناريو الذى احلم به وان كنت سأحاول ان اكون منصفا او محايدا اوحالما فهى مجرد رؤيه قد تكون حلما او كابوس الا انى لاامنع نفسى من الحلم بها وأنا هنا أعرضها فقد يكون هناك من يشاركنى الحلم او الكابوس إلا أنى لست وحيدا فى حلمى هذا

انا طفل كبير

2008-06-01T08:03:00.000-07:00

طبعا كلكوا قريتوا البوست السابق من قلم ابو النجوم لما قال العيال كبرت بس هقدر اقوله اية و هو اخويا الكبير غير " انا طفل كبير"بغيب اغيب و اجي احكي اتعلمت اية عشان اخويا الاكبر يحكي من بعدي و نتناقش و نتكلم و نتحاور و نتخانق المهم ان كل واحد فينا هيقول راية هيتكلم من غير ما يعلق على شمال البوست شعار للاخوان و لا على اعلى المدونة شعار للوفد و لا على يسارها شعار للشيوعية و لا هنتكلم من ورا اي شعارات هنتكلم زي ما كنا مدونين

او زي ما انا عرفتهم يا ابو النجوم شباب بتفضفض بتصرخ بتبكي بتضحك و ممكن تلعب و تهزر و تحب و تكره شباب طالع احساسها من جواها شباب و بنات احترمتهم

لكن ازاي بين يوم ز ليله لقيت الشباب دول مش موجودين و جه مكانهم قطع من الشطرنج تحركها اهواء قوى المعارضة

انا ارفض ان اكون قطعة شطرنج صحيح انا طفل كبير بس مش قطعة شطرنج

و لما اللعبة انتهت و الاضرابات فشلت يا عيني قطع الشطرنج اصبحت بلا هوية و لا هدف فتناثرت في عالم التدوين و اندثر ابطال كثيرون و اصبح عالم التدوين خاليا من علامات لطالما فرحنا لانتصاراتها و انكسرنا من هزائمها و الي ان يعود جيلي و جيل ابو النجوم ليس جيلنا بمعنا انه الجيل المماثل لنا في العمر بل لا و الف لا كما قالتها بنت الاسلام

بل المماثل لنا في الفكر من رضا بأن يكون طفل كبير خير من ان يكون قطعة شطرنج

----------------------------

شمس الزناتي

-------------------------

2008-05-07T10:47:00.000-07:00

العيال كبرت

فين الشباب سايب مدونه العيال دى ورايحين يكتبوا فى مكان تانى ولا انتم كبرتم وخلاص ماعدش عندكم الوقت علشان تكتبوا ولا ممكن نقول انكم فى ضيافه حبايبنا الحلوين وننزل منادى ينادى عليكوا ونعمل منكم ابطال .انتم مشغولون فى ايه ؟؟؟ الوضع الطبيعى انكم زى اغلب المدونين المصريين بيشتغلوا عند بطال باشا بيعبوا الضل فى قزايز يعنى نوم وش الفجر وصحيان فى العصارى . خلاص بقى اكتبوا لنا حاجه نستفيد منها وتنفثوا عن غضبكم وقرفكم فى المدونه دى .أوالظاهر انكم مشغولين فى اضراب خمسه مايو الفاشل !!!!!

طيب انا اعرف ان اللى يعمل اضراب يكون اساسا بيشتغل ويمتنع عن الشغل لكن انتم بطاله مع سبق الاصرار والترصد طيب هتعملوا اضراب ازاى ؟؟؟

بجد حال البلد وشباب البلد يحزن .ونلاقى تجار السياسه بيلعبوا دلوقتى على ورقه المدونات لان الحكومات واجهزه الامن حست بخطورتها ... وكل واحد منهم عامل نفسه بطل على حساب الغلابه وكل واحد بيقول انه هو اللى خطط لاضراب سته اربعه وانه لما ماشاركش فى اضراب خمسه مايو فشل لانه العقل المفكر والقوه العظمى فى عالم الاضرابات .... ياأخى اتنيل على عينك هو فيه اضرابات تنفع مع العالم بتوع الامن دول . الناس دى مابتفهمش غير لغه القوه والبقاء للأقوى مش للضعفاء المختبئين خلف اجهزه كمبيوتر وفاكرين انهم بيديروا العالم وبيصلحوا الكون وادينا شفنا اسراء المدونه طلعت من عندهم بتقول حقى برقبتى وكل واحد راح عندهم بعثه كام يوم قال انا توبت توبه نصوحه .لا والطامه الكبرى الجماعه بتوع الاخوان قالوا مدام اضراب ابريل آثر فى الحكومه وخلى نظيف جه المحله جرى ووراه الوزرا بتوعه طيب مااحنا نركب الموجه ونتبنى الاضراب اللى بعده !!!! لكن لاتأتى الرياح بما يشتهى اخوانا البعده والاضراب فشل فشلا زريعا لان الناس عارفه ان الامن عنده حساسيه من الاخوان ومدام الاخوان قالوا هنشارك تبقى العمليه هتقلب غم فى الآخر . وبناء عليه كل واحد راح شغله وطنش ام الاضراب وتبرأ من الاخوان وعمايلهم السوده لان العمر مش بعزقه والجماعه بتوع امن الدوله مابيعرفوش يهزروا واذا هزروا فهزارهم تقيل على القلب والقفا وتانى حاجه الاضراب الاخير ده عامل زى ابن الحرام مالوش اهل يعنى لو الواحد طنش مافيش حد هيلومه ولا هيعاتبه وكمان ماحدش عارف ايه اهداف الاضراب التانى ده ولا ايه الطلبات اللى هنطلبها من الدوله علشان نفك الاضراب يعنى بصراحه كده اضراب مالوش طعم ولا ريحه والحمد لله انه فشل علشان الاخوان يعرفوا انهم مايقدروش يحركوا قشه مش يحركوا الشارع المصرى بجلاله قدرة .عموما من هنا بطالب العيال انها ترجع تكتب فى المدونه دى وبلاش خوف لان من خاف هاف وبكل الصدق وحشتنى كتاباتهم خصوصا شمس والجيزاوى

2008-04-09T09:08:00.000-07:00

أنا ارهابى

لو معنى الارهاب انى مسلم فأنا ارهابى ولو معنى الارهاب انى باأحب مصر فأنا ارهابى

ولو عشان باأشوف الظلم وأقول له لا فأنا ارهابى ولو علشان قلت للحكومه انها فاسده فأنا ارهابى

طيب تقولوا ايه على زوار الفجر وتقولوا ايه على تلفيق القضايا وتقولوا ايه على المعتقلات اللى مش مكفيه المعتقلين اللى فيها وتقولوا ايه على ان مفيش انتخابات حره فى مصر من خمسين سنه نفسى اعرف مين الارهابى احنا ولا حكومه العساكر ورجال الاعمال

يعنى لما ندافع عن حقوقنا ونحب بلدنا نبقى ارهابيين ولما الحكومه تدوس على كل القوانين وتضرب الشعب بالجزمه مش ارهاب طيب لما فيه قانون لمكافحه الارهاب طيب فين قانون مكافحه الارهاب الحكومى . وهو فين القانون المحترم فى مصر نفسى الاقى قانون واحد بيطبق على الكل مفيش خيار وفقوس ونفسى الاقى كاتب مش منافق بيكتب من غير مايتلفت حواليه ونفسى الاقى قاضى بيحكم وهو عارف ان الحكم هيتنفذ على العالى والواطى نفسى اعيش فى مصر زى كل الناس أحس أنى مصرى ودى بلدى مش دايما حاسس انى غريب . نفسى آلاقى الناس متبسمه فى الطريق أتحداكم لو لقيتم حد بيضحك وانتم ماشيين الا اذا كان مجنون وده اللى سلوكه ضربت من كتر الغم والرعب الحكومى . نفسىفى حاجات كتير لكن عارف انها مش هتتحقق طول ماالحال كده . لازم نعمل حاجه ونتصرف انا مش عارف مصر دى . انا عايز مصر بتاعتى مصر الطيابه والحب مصر الفلاح والعامل مصر القافيه والضحكه من القلب مصر الجار بيحب جاره مصر الاغانى والامانى اللى ممكن تتحقق . مصر فين نفسى مصر ترجع لى وانا ارجع لها فين مصر ياولاد مصر ياولاد البلد فين جدعنتكم وفين النخوه وفين وفين وفين . آآآآآآآآآآآآه لو قعدنا ندور هنلاقى مصر راحت مننا مصر اتسرقت من غير مانحس واحنا اللى اتسرق مننا وطن اسمه مصر مش محفظه فى اتوبيس ولا جزمه فى الجامع دى بلد ياناس اتسرقت مننا .

وفى الآخر لما نقول للحرامى لا يقولوا علينا ارهابيين . طيب ده اشرف لنا اننا نكون ارهابين أفضل من أننا نسرق بلد بحالها من أصحابها الحقيقين .واذا كان ده هو الارهاب فلى الفخر أن اقول أنا ارهابى والف ومليون ارهابى

Check out my Slide Show!

2008-02-06T08:37:00.001-08:00

ما الذي جناه الحب

2008-02-06T05:03:00.000-08:00

الي الذين قست عليهم الدنيا ووقفت دائما أمام أمالهم وأحلامهم لتحرمهم من أجمل ما فيها

الحب

جاؤا الي الدنيا بعيون بريئة وقلوب خضراء وعلقت عيونهم ببراءة السماء الصافية الزرقاء وتحت أشعة الشمس الساطعة أغمضوا عيونهم وحلقواا في عالم الأحلام عالم يتمنونه عالم بسيط لا يضم سواهم وسوي من يحبون ويعشقون ويرجون باتوا يحلمون يبتسمون يضحكون يرسمون بنقاء قلوبهم لوحات جميلة متعددة لوحات تحمل بين لمساتها كل صور السعادة وكل معاني الأمن والأمان المتجسد في بقائهم معا امتزاجهم سويا احساسهم الطاغي بحلاوة الحياة لوجود الأخر بها بجواره أنيسا ونيسا حلقت الأرواح بعيدا في السماء وبقت بها حتي حل المساء معا بين النجوم سائرون شاعرون أن كل النجوم ناظرة اليهم بغبطة المحبين اقتربوا من القمر المضيء فاذا بنوره الباهر يخبوا باقترابهم واذا بهم يشعرون أن طاقة من نور باهرة تغشي العيون تخرج من أعماقهم من قلوبهم لتضيء الكون كله بضياء حب بلا حدود حب خالد باق قادر علي الصمود مهما قست عليه الظروف وغمر ضوء الصباح المكان فاذا

بعيونهم تنفتح علي واقع تلاشي أمامه صمودهم واقع يفرض عليهم الانفصال انفصال أرواحهم الطاهره حاولوا

التماسك الصمود البقاء

ولكن

ماذا يفعلون

بعد هذه الكلمات التي ربما لاتعني شيء أطرح سؤالا لعلي أجد عندكم جوابا

ماذا يفعلون

يرحلون

يفترقون

ينسون أحلامهم

يتبرءون من أمالهم

ويظل سؤالي

ما الذي جناه الحب لينهار دائما تحت بوتقة الظروف المادية القاسية التي لا يأتي من ورائها الا جرح قلوب ذنبها الوحيد أنها أحبت بصدق وتمنت خلود حبها والي الأبد بدعوة خوفهم علينا وحرصهم علي مستقبلنا ألا تعلمون يامن تدعون حبكم لنا وحرصكم علينا أننا لايعنينا شيء في هذا العالم سوي بقائنا مع من نحب ونهوي

عار عليكم عار عليكم عار عليكم

2008-01-22T15:09:00.000-08:00

في عام 2002 بتحديد يوم 1 و 2 و 3 و 4 ابريل 2002 كنا في جامعه القاهرة نهتف من اجل القدس إنا افتخر أنى من دفعه التي دمرت 18 سيارة شرطه منهم 7 مدرعات الدفعة التي أجبرت السفير الاسرائيلى في مقر السفارة إن يغادر السفارة وتقفل لمه ثلاث أيام نظرا لثورة التي كان فيه جامعه القاهرة هذه هي المدرسة التي ربيت فيه مدرسه جيل الصحوة اذكر أنى كنت من الدفعة التي دمرت محل كنتاكى بجوار الجامعة رد على مقتل محمد الدرة
كنا نهتف يا الأقصى لا تهتم راح نفديك بروح ودم
كنا نهتف 1 2 الجيش المصري فين
كان زملائنا الذين اعتقله يتفاخرون على من لم يعتقل لأنه كان شرف من اجل فلسطين
اليوم نهتف ليس من اجل القدس لا ولكن من اجل غزة فقط
اليوم لا نطالب الجيش المصري بتحرك فقط نطلب منه إن
يرفع الحصار عن غزة المحاصرة
إلى هذا القدر وصل الوضع أين صحوة أين الثورة أين الشعب المصري الذي حرك القضية الفلسطنيه إن مصر الأمن القومي للامه الاسلاميه إن ارض الكنانة
الوضع اليوم وصل الحد إلى العار إلى أنى أحاصر آخى لقد كنا نطالب بتحطى مرحله الشجب الحكومي لقضية فعلا تحركت الحكومة ولكن بحصار الفلسطيني ليس إسرائيل
أقوله عار على ألامه عار على الحكومة عار على الشعب المصري عار على الشعب العربي
عار عليكم عار عليكم عار عليكم
احمد الجيزاوي
فيديو
موجه لكم إيه الذكور وليس الرجل في مصر
النساء من اجل أبنائه كسرة الحواجز والحدود نساء عزل إمام قسوة الأمن المصري

لنك الفيديو

http://www.youtube. com/watch? v=omjGcFQxy6g&eurl=http:// ana-ikhwan. blogspot. com/

مجرد ملاحظة

2008-01-02T08:41:00.000-08:00

التعليق باالمزاج

لاحظت ان هناك فى مجتمع المدونين الكثير من الشللية او كما يسميها شباب اليوم الجروبات او ماكنا نسميه الكومبينة . وانا لااعترض على فكرة التجمعات اذا كان هناك رابط بينهم كأن يكونوا مثلا ذو ميول سياسية واحدة او ذو ثقافة معينة او ميول فنية واحدة

لكنى لاحظت ان الحكاية فى المدونات بزرميط فالموضوعات الهامة او المفيدة قليلة وهى الموضوعات التى يستفيد منها القارىء حتى لو بمعلومة بسيطة او بفكرة تغير فية شىء الى الاحسن لكن الشىء الغالب والملاحظة العامة فى عالم المدونات هى المجاملة الفجة التى يشوبها كثيرمن البعد عن الحقيقة حتى تصل الى درجة النفاق والرياء فنجد ان موضوع تقرأة وتخرج خالى الوفاض منة اى لم تستفد منة شىء وهناك الكثير من التعليقات التى تنم على ان من قرأ الموضوع لم يفهمة او قد يكون مر علية مرور الكرام وتجد هذا القارىء يعلق ويقول اننى امام فيلسوف الزمان او الشاعر الجهبذ او الكاتب الفذ واذا كتبت تعليق تستوضح منة اين هذة العبقرية تجدة يصفك بالغباء والدونية وقد يصل الامر ان يقول لك( بطلوا حقد بقى) وفى النهاية تخرج خاسرا المعركة .وهناك مانسمية التعليق المتبادل اى علق عندى وانا اعلق عندك حاجة كدة زى السلاموا عليكم وعليكم السلام وتجد التعليقات كلها ياسلام ياروحى وياعقلى اية الحلاوة دى اعد ياست وكأننا نسمع وصلة غنائية لام كلثوم مثلا

وحال المدونات اصبح بالمزاج اعلق بمزاجى وعند اللى ييجى فى مزاجى واللى مش عاجبة يخبط راسة فى الحيط .احيانا يمر اليوم وانا اجول بين المدونات فلا اجد موضوع يستحق التعليق وبعض المدونات تافهة ليست لها اى قيمة ويضيع وقتك هباء فى قرائتها فتجدها مثل الاكل المسلوق ليس لة طعم ويذكرك بأنك مريض وبعض المدونات من كثرة تعليقات المجاملة بها يصاب اصحابها بالغرور ويصدقون انفسهم فتشعر فى كتاباتهم بالتعالى والغرور فتجدهم يرتدون ثوب الواعظين والمرشدين الناصحين وهم فى النهاية عبارة عن فقاعات تزول عندما تقترب من السطح وهناك المدونات التى يكتب فيها الجنس اللطيف تجد التعليقات من نوع ياروحى وياعقلى وكثير من كلمات الغزل المقنع او الصريح ولا مانع ان نلتقى حتى يمكننا مناقشة هذا البوست!!!!

والكثير من الافلام المحروقة والقصص التى عفا عليها الزمان وتجد الكاتبة تلعب دور فاتن حمامة( انا بنت ناس ياناس بس الزمن قاسى )وان المجتمع قاسى عليها وانها تتمنى ان تعيش فى زمان غير الزمان فى العصور الوسطى منتظرة الفارس ذو الجواد الابيض (وماينفعش الوان تانية ) والكثير من ملاحظاتى هذة كنت لااود ان اكتبها هنا حتى لايقول البعض : تنصحون الناس بالبر وتنسون أنفسكم ولكن لأنى آمر بحالة نفسية لايفرق فيها النقد مع الشتيمة أو حتى الضرب بالاحذية فرأيت ان أصدر بعض همومى الى الغير ممن يعرفون انفسهم او ممن يمارسون احدى هذة الالعاب التدونية التى ذكرتها

ولكنى هنا كما نقدت البعض والكثيريين الا انى يجب ان اشيد ببعض المدونين الذين يحملون على عاتقهم هموم أوطانهم ويدافعون عن قضايا تتعدى حدود الأوطان وتسمو بفكرهم الى أعلى المراتب فيحاربون من أجل الأنسانية والأنسان وبعض المدونات تجد فيها الكثير من اللمحات الأدبية والتى أسعد كثيرا بقرأتها والمرور بها ولكنى أخاف من التعليقات حتى لاأقع فى مجال المجاملات والرياء ولأنى كبير حبتين فى السن فأنا أعلق فى مدونات الجنس الناعم وانا مطمئن ففروق السن تعصمنى من الشبهة وانا احترم الكثير من المدونات التى تحمل فى طياتها أفادة لى ولمن يقرئها وأتمنى أن يعلم الجميع أن التدوين سوف يكون لة فى المستقبل شأن عظيم فلنكن على قدر المسئولية ولنكتب لنفيد الاخرين ونفيد انفسنا .

يبدو انى قد تجاوزت الحدود مع البعض فى نقدى لكنى لم اذكر احدا بأسمة حتى لايكون لة حقوق فى رقبة هذا القلم الممل الذى يكتب احيانا او كثيرا مالا اريدة ان يخرج الى العلن فمن نالة غضب من كلماتى هذة فالذنب على القلم فهو من كتبها فعاقبوة كيفما شئتم .

صوتى ياللى منتش غرمانه

2007-12-31T04:05:00.000-08:00

فاكرين فيلم خلى الدماغ صاحى بتاع سامى العدل و مصطفى شعبان لما سامى العدل كان عامل فيها جن و ابن ملك الجان ؟
فاكرين لما كان بيحاول بينظف المنطقه بتاع مصطفى شعبان و كان عاوز برصف الشارع ؟ و كل اما يجى يرصف الشارع الحكومه تكسر الرصف بحجه دخول الكهربا او التليفون او الصرف ؟ يعنى هو بينظف و الحكومه متعمده تبوظ
ده يا جماعه بيحصل عندنا و اكيد عند كتير منكم
بس من غير ما يطلع لى لا جن و لا عفريت و لا اى حاجه
كل ما فى الامر احنا تعبنا من عدم النظافه و قلنا ننطف
و لمينا من كل شقه مبلغ و قدره و قلنا هنرصف الشارع نظافه يعنى
و بعد اما لمينا من كل شقه الفلوس و رصفنا الشارع
و قلنا هننطف و نطفنا الحمد لله لكن هيهات هيهات
مين اللى بنطف ؟ الحكومه رافضه نظافه الشعب
الان و بكل بجاحه يتم تكسر الرصف فى مدن كتير بحجه دخول الغاز الطبيعى
اهلا بيك يا عمو الغاز بس هو على شان حضرتك تدخل لازم تبوظ لنا الدنيا ؟ ربنا يسمحك
يا ريت يا حكومه تبئى تصلحى الشوارع تانى
مع انى متاكد ان ده عمره ما هيحصل و مش هيحصل ربنا يسامحكم بئه

اخوكم محمد مارو

استكمالا للمسيرة .............البوست دة للاحرار فقط

2007-12-17T06:01:00.000-08:00

استكمالا يا جماعة للمسيرة اللي بدأناها هنا
http://anameshm3ahom.blogspot.com/
عشان محدش يقول ان احنا بنكتب و خلاص دة يا جماعة بانر التضامن مع قضية المواطن المصري جمال طه و الظلم الذي وقع علية و لا زال يقع على كل مصري يعمل بالسعودية

ياريت فعلا اللي متضامن مع القضية يضع البانر دة

و دة كود البانر
الكود هنا

جماعة كل متضامن مع القضية يعلق البانر دة على مدونتة و ان شاء اله ربنا يقدرنا و نقدر نعمل حاجة

------------

شمس الزناتي

-----------

وفين اخر الحكايه

2007-11-22T12:56:00.000-08:00

في الاول انا متأسف عن تأخري في الكتابه

بس اعزروني عشان الدراسه

المهم

ان مش عارف اخرت تدهور الشعب ايه

في الاول ظهرت حكايه ان الرئيس مات

وفي الاخر يطلع ده كله اشاعات

بس يا تري من اللي نشر الاشاعات دي

هل الحكومه ام الشعب الغلبان الضعيف ؟؟؟؟؟؟؟؟؟؟؟

وبعد كده حصلت الخصخصه

اللي اتباع فيها عمر افندي وشركه الكهربا

وبرده الشعب ساكت مفيش تحرك

بس الجديد واللي انتشر كتير في الوقت ده

مشكله زياده الاسعار

ناس كتير اتكلمت علي كل الموارد اللي مفيش غنا عنها

زي السكر الي هيبقي الكيلو 7و8جنيه

وايضأ الزيت اللي هيبقي الازازه 10 جنيه

والكرثه بقي هتبقي في الانابيب

اللي هيوصل سعرها الي 30و35 جنيه

وغيرها من الحاجات التانيه

وده كلام الناس دلوقتي في الشارع المصري

مش كلامي انا

طيب ولو ده حصل

الناسي الغلبانه هتعمل ايه عشان تعيش

تسرق يعني ؟؟؟؟؟؟؟؟

ولا تنصب ؟؟؟؟؟؟؟؟؟

ولا تعمل ايه عشان تعيش

سؤال تاني ولو حصل

هل الشعب هيفوق من الغيبوبه ؟؟؟؟؟؟

ولا يفضل نايم في العسل

مفيش اي تحرك زي كل مره

ياريت نتحرك ونقول راينا

بكل صراحه وبدون خوف من اي شيئ

انا دلوقتي حاسس اني بشوف قصه وهي الشعب

وعايز اعرف اخر القصه والحكايه دي فين

واشوف الناس بتقول ان

هو الاهلي اتغلب بجد ؟

2007-11-12T07:37:00.001-08:00

من ساعة ماتش الاهلي و الناس في الشارع و على النت و في بعض المدونات و على الفيس بوك

ملهم سيرة غير ان الاهلوية يدافعوا عن الاهلي و الزملكاوية اللي مش هم يعني

يشمتوا في الاهلي

و استغربت اية اللي خلي الناس متعلقة بالموضوع دة كد ؟

عايز تعرف اجابة السؤال انا اقلك

يمكن لان الاهلي ادي امل للناس ان مصر اسمها يتعرف للعالم كله و لو لمرة حتى و لو عن طريق الكورة

بدل ما احنا هيبتنا في الارض في كل مجال

حضرتك ادخل على اي شات و اتكلم مع امريكي و قله مصر

هيفكرها ولاية في امريكا

و لو قلتله دي دوله مش هتقدر تقله الا دولة الاهرامات

يعني دولة الحجارة

انا عمرى ما بسخر من حضارتنا الفرعونية و اللي عرفني منكم يعرفوا اد اية بحب حضارتنا و تراثنا

بس هي الناس متعرفناش إلا بالهرم

يعني متعرفناش بالاسلام

متعرفناش بالمصريين المتحضرين اللي ليهم راي و تاريخ

طبب حضرتك جرب وادخل جوجل

و اكتب

war1973

هتلاقي النتائج الانجليزية اللغة بتكلم عن هزيمة مصر الساحقة في وجهه اسرائيل عام 1973 يوم السادس من اكتوبر

اللي مش مصدق يجرب

يا عالم انا صحيح زعلان على الاهلي

بس زعلان على مصر اكتر

و زعلان على الاسلام اكتر و اكتر

عايزين نعمل حاجة

يا ترى نقدر نعمل حاجة

و نعمل اية

هو دة السؤال

و يارب اللاقي اجابة

------------------

شمس الزناتي

----------------

مثلنا الأعلى

2007-10-28T10:08:00.000-07:00

المثل الاعلى

كلمنى الصديق العزيز شمس وعرض على فكرة ان اكون مساهما فى هذة المدونة ولحبى للتدوين ولانى اعشق مقدرة الشباب على التغيير والتطوير وقدرتهم فى التعبير عن افكارهم بصورة افضل من اجيال سبقتهم
ولكنى خشيت ان اكون نشاذا فى هذة الباقة الشبابية وخفت ان افشل فى استخدام لغة الشباب وان ابدو كاالزمخشرى بينهم واستخرت اللة وقررت ان اكتب شيئا يفيد من يقرأة وهنا كانت مشكلتى فعن ماذا اكتب عن مشاكلنا اليومية ام عن حياتى وتجاربى الشخصية ام عن حالة التدهور السياسى الذى نعانية شبابا وشيوخا .وهنا طرأت على رأسى فكرة راودتنى كثيرا .
واعذرونى لانى ساأقص عليكم قصتى مع ابنىوهو فى بداية العشرينات من عمرة حاليا . دخلت علية فوجدتة يحدث صديق او صديقة على النت وهذا لم يجذبنى لانى اعلم انة من هواة النت او فلنقل من هواة التفاهة على النت .المهم استرعى انتباهى صورة لجيفارا على اميلة ففرحت جدا وقلا فى نفسى لقد بدأ ابنك يخطو مثلك فى تكوين فكر ثورى ورأى فى الحياة ويكون لة انتماء لفكر معين وسألتة لماذا تضع هذة الصورة ولمن هى وكانت صدمتى اكبر مما توقعت صدمة قتلت الامل بين جوانحى عندما رد على انها صورة مغنى امريكى وان شكلة عجبة فوضعها على الاميل وهنا اسقط فى يدى ولم ادرى ماذا ارد وعندما اختليت بنفسى كى احاسبها وجدت انى وجيلى الملومون فيما وصل الية ابنائنا من تفاهة وسطحية فى التفكير .
وهنا تسائلت مالسبب الذى اوصلنا لهذة النتيجة وكان الرد الذى ظل يدق فى رأسى هو غياب المثل الاعلى بين الاجيال الشابة واننا نتحمل كل المسئولية فى غياب المثل الاعلى من ذاكرة الشباب فمعظم شباب اليوم تجد ان مثلهم الاعلى لاعب كرة بالنسبة للفتيان وراقصة او مطربة فيديو كليب بالنسبة للفتيات وان غالبيتهم لم يعد عندهم ماضى اكثر من شهر ولا مستقبل اكثر من شهر
فكم من شبابنا يعرف قادة مثل عرابى وسعد زغلول ومصطفى كامل او كتاب مثل رفاعة الطهطاوى ومحمد عبدة وعبد اللة النديم .لقد سقط شبابنا يوم انغاب عنهم المثل الاعلى من هؤلاء العظام وتاريخنا مملوء بالعظماء ونحن من اهملناهم من ذاكرتنا وذاكرة ابنائنا وزرعنا فيهم حسام حسن وميدو وفيفى عبدة وماريا ونانسى عجرم .ولن تعود لنا الرفعة والتقدم وان نكون فى الصفوف الاولى الا اذا عدنا الى مثلنا العليا فى كل مناحى الحياة
وقد اتخذت على نفسى عهد ان اقوم فى اخر كل مقال لى فى اى مدونة ان اذكر الشباب باأحد العظماء وان اذكر نبذة مختصرة عن حياتة وكفاحة حتى يتخذة البعض مثلا اعلى لة فى الوطنية او الشعر او الفن او الاقتصاد ولو نجح مااسعى الية مع واحد من شبابنا سأكون رحبت مالا يقدر بثمن .
واعذرونى على ماقد اكون سببتة منصداع لكم بحديثى ولكنها الحقيقة التى للأسف نخشى مواجهتها مع النفس

عادل نجم

ألى المدون الجميل شمس

2007-10-25T08:14:00.000-07:00

أعتذر لصديقى شمس عن تأخرى فى الكتابه فى مدونه كلام عيال و التى أعتذ بالأنتماء اليها

و أعتذ بمعرفتى بشخص شمس الكريم

و هذه تعريفات اعجبتنى و احببت مشاركتكم بها

الابتسامة : انحنائة تستقيم بها كل الأمور

الحريه:هي استقلال تحميه القوى

الفيلسوف : رجل أحمق يعاني كل حياته ليذكر بعد الموت

المتفائل : رجل يسقط من أعلى برج ويقول في منتصف الطريق أنا لم أصب بعد

المتشائم :شخص يرى ان التاء حرف في كلمة الموت دون أن يربطها لتكون آخر حرف من كلمه حياة

الخ : علامة توحي للآخرين بأنك تعرف أكثر مما قلت

ا لخبرة : هي عدد من الأخطاء التي ارتكبتها في حياتك السابقه

القنبلة الذرية : أختراع لتدمير كل أختراع

الدبلوماسي : شخص يطلب منك الذهاب الى الجحيم بطريقة تجعلك تستعجل تلك الرحلة

المجرم : شخص كغيره تم القبض عليه متلبس

المدير : رجل يأتي متأخرا عندما تكون باكرا ويأتي باكرا عندما تكون متأخر

السياسي : رجل يهز يدك قبل الأنتخابات وثقتك بعدها

هعيل مع الاخوان

2007-10-19T21:35:00.000-07:00

و الله وحشني كتير كتير

كلكوا وحشني

و اوشا كمان وحشاني جدا مش باينة بقالها فترة ما كتبتش في كلام عيال و لا بتكتب في مدونتها حتى و انا قلقان عليها و بدعيلها ربنا يقويها

طبعا انتوا عارفين انا بعشق التسييح في البوستات فمحدش يقلي و احنا مالنا

-----------------

المهم ما علينا النهاردة بقى كان يوم طويل عايز احكلكوا علية بسرعة كدة بس استحملوني

هبدأ باول حاجة حلوة فية لما رحت و اتشرفت بمقابلة

emy

و عرفتني على

coca

و الدكتور اياد و احمد بتاع هرتله ليلية و الشهيد الحي و محمود و احمد و ناس كتير حبتهم جدا

و كان حاضر معانا اخواتي اللي بحبهم جدا جدا

سكوت هنصوت و حين البأس

و قعدنا قعدة لذيذة جدا جدا

استفدت فيها كتير جدا جدا من الحاضرين خاصة من الدكتور اياد

كنا متفقين انا و هو في وجهات نظر كتير جدا

و قدسنا جدا اثناء حديثنا جميعا منهجية احترام الاخر

و بصراحة سكوت هنصوت اقترحت موضوع تنظيم القعدة بالقلم و كان موضوع جميل جدا

قلم جاف مش قلم على الوش محدش يفكر غلط

ههههههههههههههههههههههه

المهم بقى ان القعدة خلصت و انا فرحان بيها جدا و رجعت البيت

و فوجعت بشوية اخبار اليمة جدا خلتني مش عارف انام

اعمل اية اعمل اية مش لاقي حاجة خالص اعملها

اضربت في عقلي و هفني الجنان و ياريته ما حصل و قلت ابص بصة على برنامج الاخوان المسلمين في انشاء حزب

عملت حاجة غلط انا كدة

زنبي يجيلي المرارة؟؟؟ لية مش عارف

انا قلت قبل كدة الاخوان انا مش معاهم لكن اعمل اية فضول

هو على العموم انا خلصت فقط المقدمة و مقدرتش اكمل هحكلكوا عنها بسرعة كدة

و اقلكوا رايي المتواضع فيها

مبدئيا الكاتب اللي انا معرفش هو مين و لا يربطني بيني و بينه اي علاقة

دخل علية دخله جامدة اوي ان فية قوة مسيطرة على العالم اجمع و ان العالم كله عايش مئساه حقيقية

مما جعلني اتخيل ان المغامرون الخمسة وصلوا لانقاذ العالم

و على فكرة المغامرون الخمسة مقولة اوشا الشهيرة عن شمس الزناتي حتى اسئلوها

المهم الكاتب دخل علية بعد كدة ان خطر السيطرة دة بيقترب مننا في مصر و مصيرنا منيل بأذن الله

فكرت ساعتها اقوم الم السكاكين اللي في البيت استعدادا للخطر بس قلت استنى يمكن فهمت غلط

استطرد بقى الكاتب في حديثة و قلك الخطر اللي سيطر على العراق و افغنستان و لسة بقى هيشد في قصة لبنان و السودان و يقلب المواجع

فهمت انها امريكا على طول

طب اية الحل يا جدعان

بصراحة الراجل برضة دخل بمنطقية لا اقلك مغامرون و لا مازنجر و لا الكلام دة

قلك مصر عندها القدرة على التغيير و الحمد لله مصر اللي هتغير العالم كله و تحمي العالم كله و احنا اللي هنحل مشاكل البشرية

قلت الله ينور دة احنا الحضارة كلها منحلش لية

شوية بقى و لقيته استطرد في صفات مصر اللي هتحل دي و جاب الفساد كله

سياسي و اجتماعي و صحي و تعليمي و كرتوني و بلتوني و زعفورني جاب الفساد من اوله لاخرة

حسسني ان مصر بقت صندوق قمامة كنت هقوم اخد حمام من كتر الفساد اللي حوطني

لا الجمال كله و هو بيعرض الفساد الاقتصادي و عمال يقول

فســــــــــــــــــــــاد في توافر المدخرات

انا كنت عايز انام قريتها اية

فســــــــــــــــــــــاد في توافر المخدرات

قلت لأ كدة الموضوع زاد عن حدة فساد في توافر المخدرات لأ

كله إلا المخدرات امال الشعب يعيش ازاي لا اكل ولا شرب و لا هواء نظيف و لا مخدرات حتى

دة يبقى عيب

فين بقى عقبال ما فهمت انها

فســــــــــــــــــــــاد في توافر المدخرات

و في الاخر قال حبة تواضع يا كابتن و احنا مش ماسكين عصايا موسى بس احنا جايين نحط حلول و هيخشلي بقى وش على البرنامج

و هنا كانت الطامة الكبرى ، صدمت صدمة وحشة قوي

يا استاذي الفاضل من اولى مقومات الحزب ليس حل المشاكل فقط

ليس الاصلاح فقط و انما الاصلاح ثم النمو ثم الارتقاء الي مرتبة التفوق انت جاي تحل المشاكل و تمشي

فين خططك للبناء

يعني انت جاي تصلح اللي اكسر جميل

طب و مين يبني حاجة جديدة

فين الابداع و الابتكار و ايجاد البدائل

هو انا الصراحة لله مكملتش من بعد المقدمة بسمن بعد اللي قريته مش عايز اكمل

اقلكوا البرنامج اهو

اللي يجيله خلق يكمله لاخره يبقى يقلي رايه

معلش اصل انا عيل عصبي و نفسيتي مش بتستحمل

ما علينا

صباح الفل

---------------------------

شمس الزناتي

-----------------------

حكايه ورقه

2007-10-15T04:30:00.000-07:00

قصه قصيره
البدايه : تبدأ حكايتنا من أكبر مصانع الورق فى العالم حيث تم الانتهاء من اعداد و تجهيز و تصنيع الورق
و كان من بين هذه الاوراق التى تم الانتهاء منها و سوف يتم استغلالها اما محليا او دوليا ورقه
تحمل بين سطورها الكثير و الكثير من الامانى و ايضا الكثير من المخاوف
فقد كانت تخاف من ان يتم استغلالها فى اى شىء يضر به الانسان اخاه الانسان
كانت تخاف ايضا ان يتم استغلالها فى مجله تعرض الصور الجنسيه و صور العرايا و كثير و كثير من المخاوف
و كانت ايضا تتمنى ان تكون جزء من كراسه طالب علم تساعده ان يستذكر دروسه و تفعه و ينفع بها غيره
و بينما هى تحلم و تتمنى و تخاف اذ بها تسمع صوت ان خذوها هى و مجموعه كبيره جدا من الاوراق و ضعوهم فى هذا الصندوق
و حملوهم ع هذا المركب
هنا بدأت تفكر الى اين سوف ياخذونى و ماذا سيفعلون بى
و لكنها لم يكن لديها شىء تفعله فانتظرت حتى تعلم الى اين سوف ياخذونها
و بينما هى فى الطريق سمعت احدهم يقول لقد وصلنا المملكه العربيه السعوديه
هنا كادت سطورها تتمزق من الفرحه و سعدت جدا انها سوف تخدم فى مدينه رسول الله و بالقرب من المسجد الحرام
لم تكن تعلم ماذا يرتب لها القدر
لم تكن تعلم انها ذاهبه لمطابع الملك فهد لطباعه المصحف الشريف
عندما علمت بهذا الامر لم تستطع الكلام او التعبير
فكانت فرحتها اكبر من اى فرحه
و تقول لنفسها معقول سوف احمل بين سطورى كلام الله عز وجل ؟
ما كل هذا الشرف التى تناليه يا ورقتى العزيزه ؟
ما اسعدك ما افرحك فسوف تخلدين مع خلود كلام الله عز و جل
و فعلا تم اخذها الى مطابع الملك فهد و تم استخدامها فى كتابه المصحف الشريف
و تم الانتهاء من كتابه و طباعه المصحف
و هنا استقر قلبها و هنئت بما تحمله بين سطورها و قالت سوف اخلد او ع الاقل سوف امكث اكبر وقت لان المسلمون يحافظون ع كلام الله و يقدسون المصحف و يقدسون كلامه
و دخلت مرحله جديده و هى التوزيع فكان نصيبها ان تذهب الى افغانستان
و تم و ضعها فى احد المساجد هناك
لم تكن تعلم بما سوف يحدث لها
فقد دخل جنود التحالف الى المسجد هنا نظرت الورقه و قالت ماذا اتى بهؤلاء الى هنا الا يعلمون ان هذا بيت من بيوت الله ؟
و بينما هى تتسال اذ باحد الجنود يحمل المصحف و يسير به وهى بين اوراقه
وبعد ذلك مزقه و قطعه قالت ياويلتى اين المسلمون ؟
اين المسلمون؟
اين المسلون ؟
هل تم ابادتهم ؟
او الم يعد هناك مسلمون كى يفعلوا بكلام الله هكذا ؟
اين انتم يا مسلمون ؟
ان كلام الله يتم تمزيقه و تقطيعه اربا و انتم تشاهدون المسلسلات و الراقصات و العرايا
اين انتم يا مسلمون ؟
من يحافظ ع كلام الله ؟
و بينما هى تصرخ و تستغيت لم يجيبها احد
و تم تقطيعها و تزيقها
و هنا ادركت ان المسلمون فى هذا الزمان منشغلون باشياء فى نظرهم اهم من المحافظه ع كلام الله
لى و لكى الله يا ورقتى العزيزه
ملحوظه الكلام ده بناء على خبر حقيقى فى قناة الجزيره
بيقول
شهدت مدينه كورنر الافغانيه مظاهرات احتجاجا على تمزيق و تقطيع المصحف الكريم على يد قوات التحالف

قضية راي عام

2007-10-03T09:10:00.001-07:00

قضية راي عام

هذا المسلسل الذي نتمتع جميعا بمشاهدته طوال شهر رمضان

و الذي كان مثار احاديث كثيرة

حتى اني وجدت المدونة

wa7damasrya

كاتبة عنه بوست قريب

و الناس كلها مش عاجبها المسلسل و اللي بيطالب بمقاطعته

مع اني شايف الموضوع غير كدة

معلش سامحوني اصل اصحابي بيقولوا علية فزلوكة شوية

يا جماعة الموضوع ان الكاتب حسن الجلاد

اللي انا ما اعرفوش و لا عمري شفته

و مش بدافع عنه عشان اداني 10 جنية

الراجل دة مش بيقول ان دي مصر

ابدا

انا متأكد ان مصر عمر ما هيبقى فيها ابن وزير يتسجن و لا ابن صول حتى

على راي نوارة

بس انا شايف ان محسن الجلاد

عايز يقول اني نفسه تبقى دي مصر

نفسه يلاقي الشرطة اللي بتنفذ القانون بروح القانون

نفسة يشوف وكيل النيابة اللي بيتحدى السلطة الغاشمة من اجل اظهار الحق

نفسه يشوف الاسرة المصرية بتطالب برجوع الحق لاصحابة مش بان المظلوم يسكت عن حقة

الراجل يا جماعة نفسه دة يحصل

و لما قال ان دي قصة و الناس افترضت انها هتحصل في مصر

مقلش ان دة بيحصل

لكن خيالة صورلة ان ربنا يهدي العاصي و كل واحد يراعي ضميره في شغله

بس كدة

دول كانوا كلمتين على الماشي

فكروني المرة الجاية في قصيدة شعر عايز اكتبها بقاي كتير و بنسى

و السلام ختام يا احسن جدعان

--------------------------------------------------------------------------------------

ملحوظة لفريق كلام عيال : انتوا عارفين انا بحب السياحة فملاحيظي بقولها على الملئ

تم ارسال دعوة لكل من المدونة ايناس الفكر السجين و المدونة بطة بكر للمشاركة في كلام عيال و مستنى رايكم

---------------------

شمس الزناتي

-------------------

نقطه النور

2007-09-27T23:42:00.001-07:00

ما أروع عالمنا الأفتراضى سبحنا فى تياره لنهرب من عالم و اقعى أصبح مملؤ بمفردات مشوه

أنجذبنا و أنغمسنا فيه أصبح عالم النور المدينه المثاليه بالنسبه لكل فرد فينا

ألتقينا فى الخيال محلقين بسعاده على أختلاف أصولنا و جذورنا و نشأتنا و عقائدنا

هرباً إلى بعضنا البعض كلاً ألى الأخر

هرباً من خوف كان رفيقنا منذ وعينا على الدنيا وربما قبل أن نعى

لنا أن نطمأن الأن أصبح لكل مننا بيت مملؤ بتحف و لوحات غاليه هى موضوعاتنا التى نطرحها

و ننتظرمن بعضنا البعض الفهم و الأدراك لداخل نفوسنا ننتظر الدعم الذى لا نأخذه عاده من

العالم الواقعى

و على أختلافنا فى الفكر و الهدف نربت على بعضنا البعض برفق و أحترام و نوضح وجهات النظر

لبعضنا البعض كأننا و احد

يجب أن نحافظ على هذا العالم فهو الامل الأخير لكل منا

فلنتفق أن لا يهاجم بعضنا البعض ببوستات قد تشينه و كومنتات لها نصل السكين فى الذبح

أنها القلعه الأخيره لنا كلنا

لا تحطموها أنها النور من النار أنها الفردوس هرباً من الجحيم أنها أرض الملائكه فلا تسمحو

لشياطيننا فى التسلل و سحقنا جميعاً

لازم تقرا و تعمل حاجة

2007-09-25T06:16:00.002-07:00

بصوا يا جماعة انا هبدأ على طول عشان انا عارف الناس كلها في رمضان

وقتها ضيق جدا

كل الموضوع ان المدونة الرائعة في القلب كانت كاتبه بوست دفاعا عن الرسول علية الصلاة و السلام

و وجدت ان من بدأ الدعوة لهذا البوست هو مدونة انسان

و الراجل دة يا جماعة كان بكل بساطة عايز يعمل يوم كلنا ندافع في عن الرسول

يعني كلنا ننزل بتدوينة في اليوم دة دفاعا عن حبيبي محمد صلى الله علية و سلم

و قد اقترحت على انسان علية ان تكون هذه التدوينة في يوم 27 رمصان الموافق 9 أكتوبر و قد ابدى سعادة بالغة في ان يكون هذا اليوم بمثابة بوست من كل مدون يدافع فية عن رسول الله

طبعا انا عارف الفلاسفة اللي هيطلعوا كدة مرة واحدة و يقلك

طب مش كنا نتناقش في اليوم و الساعة و نعمل استفتاء على اليوم حتى يكون متوافق مع الجميع

هقلك لا و الله مش طالبة الحوارت دي

دة انا بقلك خدها كلمة من مسلم متعصب لدينه

هو بوست هتنزل بيه دفاعا عن الرسول علية الصلاة و السلام اللي هو محمد صلى الله علية و سلم اللي هيتشفعلك يوم القيامة

هتنزل بالبوست يوم 27 رمضان تشيله 29 رمضان مفيهاش مشكلة

اصلي يوم 27 رمضان اللي هو 9 أكتوبر هكتب بوست مهم قوي

لا و الله الاسلام اهم و رسولك اهم محنا مجبلناش الوكسة ألا ان احنا عمالين نقدم اولويات علىدينا الحنيف

اصل انا مش فقيه في الدين عشان اكتب و ادافع عن النبي علية افضل السلام

اكتب اللي في قلبك ملكش دعوة

لا اصل انا مسلم بالاسم يعني معرفش ادافع عن الرسول باية و عن اية

تدافع عن الرسول من مين ادخل مدونة انسان و انت تعرف و الموضوع مش محتاج يعني

تدافع باية بقى يا سيدي مش عارف خالص شوف اي مدونة تعجبك كاتبة كلام بتدافع بية عن محمد علية الصلاة و السلام و انقل الكلام

copy and past

و محدش هيحاسبك فيها

---------------------------------------------------

اه نسيت انك لو مش هتعمل اي حاجة في اي حاجة على الاقل بلغ اللي في البوست دة لحد تاني يمكن يعمل بية

-----------------------------------------------------------

اتفقنا يارب نشوف المسلمين هيعملوا اية لدينهم

الله بلغت اللهم فاشهد

و اللهم اعفنا من حرقة الدم المستقبلية

قولوا امين

تحياتي

شمس الزناتي

ايه اللي حصل للبنات

2007-09-24T05:11:00.000-07:00

بصراحه الموضوع ده محيرني انا شخصيا

ياما شفت بنات وولاد كتير

بس المهم

الايام ده بشوف بنات ما شاء الله عليها

بس بشفها مشيا مع احد الاشخاص وهو لا حول الله ملهوش اي لزمه

ممكن يكون بيدحك عليها وممكن لا

بس اللي انا نفس اعرفه

هو في الوقت اللي احنا فيه ده

لما تيجي لاول مره بنت تكلم شخص

ايه اللي بيعجبها في الشخص ده

معئن ممكن نتكون هي زي العسل

وهو ملهوش لزمه

وممكن نتكون بتحبه موت وهو يكون مش سائل فيها

وبرده بتقرب منه اكتر

بس انا عايز اعرف هي البنات بيعجبها ايه في مثل الاشخاص

اللي بتلعب بعقول البنات

وهي مش حسي وممكن تديله اي حاجه حتي لو حياتها

فدا الحب وهو ميكنش سائل فيها

وتيجي في الاخر وتندم علي كل ده

بس انا نفس اعرف حاجه وحده

هي البنات ايه اللي بيعجبها في الانسان

عشان تكون حباه وشيفا انه هو ده الانسان المفضل ليها

انا سئلت ناس كتير وبرده عايز اعرف رايكم

لان انا نفس بجد اجد اجابه مقنعه للسؤال ده

انا رجعت و و الله راجع عشانكم

2007-09-17T08:48:00.000-07:00

اولا يا جماعة وحشتوني جدا جدا مش عارف اقلكوا قد اية بس انا بقى كان عندي مشكلة ان النت كان فاصل عندي و شوية مشاكل تانية

بس رجعتلكوا تاني نفضفض من تاني

ما علينا

المهم ان انا مقلتلكوش كل سنة و انتوا طيبين

و رمضان كريم و الله اكرم و شهر سعيد على الجميع

كلكوا كل سنة و انتوا طيبين

بجد نفسي اقلها لكل الناس نفسي اذكروا اسم اسم

بس انا كدة هطول عليكوا

اقلكوا انا هطوا و اللي بيحبوني و وحشتهم زي ما وحشوني هيكملوا معايا

عشان انا عندي كلام كتير

و ناس كتير عايز اسلم عليهم كتير

في منهم اللي مكنش سايبني لحظة

زي

نوشة و التابعي و العندليب و اسلام

و وحدانية كمان ( منى المحمودي ) بصراحة يا جماعة اخت غالية علينا كلنا

و كانت متبعاني على الماسنجر اول باول

انا عارف انها زعلانه مني شوية الايام دي

بس بكرة هتعرف ان مفيش خصام بين الاخوات

و طبعا مقدرش انسا الصديقة الغالية جدا في القلب ( اوشا ) مش عايز

اقول انسانة رقيقة قد اية و هي اول من هناني برمضان

كل اصحابي في كل الجروبات وحشوني جدا خاصة جروب الفاجومي

و كل اعضائة اللي حبتهم جدا

طارق المملوك و هشام شاهين و احمد عزام و محمد الجزار

و الله انا اسف لو كنت نسيت حد انا الذاكرة عندي غريبة و فظيعة

ما علينا

طبعا انا منسيتش والدي الروحي استاذ زهير البدري و اختى باكينام و الاستاذة سمية

و نوراة نجم وحشني مقالاتها جدا

كل دول عايز اقلهم كل سنة و انتم طيبين

و مجموعة ابناء مصر

كلهم دون استثناء وحشوني
صاحب البوابة
ابن ناصر
لماذا نرحل
سكوت هنصوت
حنتكلم
حين البأس - منذر حباصة

عمر الشرقاوي

طبعا فية مدونين زمايلي عايز اقلهم كل سنة و انتم طيبين مدونين مقدرش انساهم ابدا

زي بطة بكراللي اكتسبتها اخت بجد

و الجيزاوي و مارو و هشام بتاع ارض هوجورتس و ايناس

و الله بجد انا مش عارف اذا كنت نسيت حد

على العموم اعذروني انتوا بقى

و برضة عشان فية ناس شافت الكليب
اللي نزل على مصري للنهاية
و عندهم تسائلات كتير و منهم اللي شاف العمل من اطار فني بس
عايز اقلهم احنا هنكمل في مشورنا ان شاء الله

و ركزوا شوية في صور اجدادنا في الكليب و ادي لنك الكليب تاني

http://masryforever.blogspot.com/2007/09/blog-post_10.html

------------------------

شمس الزناتي

-----------------------

اللهم تقبل منا رمضان

2007-09-12T01:47:00.000-07:00

نقل الخلافه

2007-09-09T16:08:00.000-07:00

ترددت اشاعات عن موت حاكمنا ومولانا حسني

بس ياتري لو هو مات

الخلافه تتنقل لمين؟؟؟؟؟؟؟

وده بصراحه سؤال يمكن محير بعض من الشعب

وتسمحولي ارد واقول ان الخلافه كده كده

انتو عارفين لمين

بس للي مش عارف هي مش هتخرج بره

هي هتفضل في يد العائله الكريمه

بس ياتري ده قريب

ولا في كلام تاني ؟؟؟؟

من الشعب

بس اللي يدل ان قريب اوي هتتغير الخلافه

كلام دكتور احمد نظيف

والكل عارف طبعا انه نظيف اوي

ولا ايه رايكم في كده ؟؟؟؟؟

المهم

انه صرح في حوار مع احد الصحفين

صرح وقال ان الرئيس لان يتنحي قبل نهايه ولايته

وفي نفس الوقت قال

ان الوطن في مرحله انتقال السلطه

منين هيتنحي ومنين انتقال السلطه

بس المهم لو الخلافه ذهبت لوريثه

زي مكل الناس عارفه ان ده هيحصل

ليا سؤال هل يقوم الشعب يد واحده ورجل واحد

عندما يرون نفسهم في تحت حكم الوريث

ولاهيفضل في الغيبوبه اللي استمرت سنين ؟؟؟

ومش عارف هو ايه اللي مصبر الشعب حتي وقتنا هذا

نفس اجد رد لكل ده

بس في الاخر قريب اوي

ابشركم بحاكمنا

اسلام

لسه بسأل.....ليه ؟؟

2007-09-07T10:56:00.000-07:00

ليه يا جماعة
ما عادش في خيـــــــــــــــر زي زمان ؟؟
ليه لحد دلوقتي بمشي أتلفت حواليا
لاييجي مريض من هنا ولا من هنا
يقوم خابطني كافيني على وشي
أقوم معيطة في نص الشارع
والمرضى التانيين
يضحكوا
!
حسبي الله و نعم الوكيل
ليه مايفكرش إني أخته
أخت صاحبه
أخت صاحب ابن عمه
أي حد
ما أنا أكيد أخت حد يعني
ليه ماعادش في أمان ؟؟؟
أنا قعدت فترة معتكفة في البيت
و يوم مانزلت
مريض من المرضى دول
تقريبا يعني كده
وصلني المشوار بتاعي
من البيت...للغيط
!!!!!!
وخلاني طول ما أنا ماشية
عاملة زي الزجزاج
أصله كان بعجلة المحروس
وعيني على الأرض....هموت وألقط
زلطاية معتبرة أبطحه بيها
بس أنا أصلي خفت أنشن أعور واحد غيره
وأقول دلوقتي يمشي....ييجي جنبي
يشتمني....ويفلق
!!!!!!!!!
لما خلاني أقسم بالله ماشية أكلم في نفسي
ماهي كانت ناقصاه ابن...الظريفة
منى

قلب الوطن.....مجروح

2007-09-07T09:35:00.000-07:00

بسم الله الرحمن الرحيم
والله يا جماعة أنا فقدت القدرة على الكتابة...فسامحوني..مش هقدر غير إني أنتقي كلمات بعض الأغاني و أنقلهالكم...عشان تعيشوا معايا أحاسيسي العجيبة اللي أنا فيها دي
و والله ده كمان في مدوناتي....ما بقاش عندي القدرة إني أكتب حاجة جديدة..و لا شعر..ولا نثر
ودي من أجمل أغاني محمد منير

قلب الوطن مجروح...لا يحتمل أكتر
نهرب..وفين هنروح...لما الهموم تكتر
نحمي غصون الورد...من دمع سال ع الخد
آه يا حبيبة الروح...قلب الوطن مجروح
لو حتى قلبي تاه...بين الشجن والآه
ياللي لقاكي حياة..أنا حبي ليكي..صلاة
يا مطيرة العصافير...رجع الهوا بالخير
لو قلبي عاد...ضميه
إديه حنان...وداديه
ده الصمت مش لينا
فين الولد ما يروح....لازم يعود أسمر
قلب الوطن مجروح...لا يحتمل أكتر
لو تنطقي الموال....لازم يروق الحال
محتاج ليا دراع....و شراع وراحة بال
محتاج ليكي نجوم....هايمة في حضن هلال
لو بحرنا...نسقيه
صحيه..وبوسي عينيه
ياما بكرة يسقينا
خلي طريق البوح...يصبح طريق مرمر
قلب الوطن مجروح...لا يحتمل أكتر

المرور عبر الجدران

2007-09-03T13:29:00.000-07:00

أنزعجت جدا وأنا ارى أغلب شبابنا ألى زى الورد محبطين ولا يرو فى الحياه ما يستحق

إلى كل شاب يرى ذاته صغيره وليست على قدر

إلى كل شاب لا يرى أمل أو بصيص نور داخل ذاته

أنت هناك يشار اليك بالبنان أتعلم لماذا ...........لأنك ببساطه عملاق

أن كل شخص يتمتع بذكاء من نوع خاص من الممكن أن يكون ذكاء أجتماعى-معرفى علمى-ولاكن هناك أنواع أخرى من الذكاء غير مشهوره مثل

الذكاء اللغوى وهو فن استخدام مهارات اللغه وتعلم لغات أخرى

الذكاء الموسيقى كأن تستمع ألى الموسيقى وتطرب بأنواع معينه وتعايشها أى انك تملك وجان و أحساس لك أن تفخر به

والذكاء المنطقى و الرياضى والذكاء المكانى كأن تعلم المكان الذى إذا تواجت به سوف يسعدك ويقوى ذهنك ويشرح فؤادك

الذكاء الجسدى الحركى كأن تعلم كيف تتحكم فى جسدك لأن جسدك له لغه حوار وبذلك أن تعلم كيف تستخدم جسدك فى توصيل ذلك الحوار

الذكاء الشخصى و الأجتماعى وهو يساعد على الأندماج داخل المجتمع

استئـــــــذان

2007-09-02T15:13:00.000-07:00

بسم الله

سامحوني على طلبي السخيف

بس هو يعني منعا للمل

على اعتبار إني شخصية ملولة الصراحة يعني

أنا بطلب من كل إخوتي أعضاء المجلس الموقر

إحم إحم

قصدي أعضاء البلوجر الموقر

إنهم لما يكتبوا بوست

ما يطولوش فيه أوي

بمعنى

ما تسيبوش أسطر كتير بين السطر و أخوه

ده بيطول المقالة وممكن أوي يمنع

السادة المسؤلين في القلم السياسي

إيه القدم ده ؟؟

قصدي السادة القراء و أنا طبعا منهم

من إكمال القراءة

بعتذر جدا عن طلبي البايخ

شكرا

-تصقيف بأى وكده-

منى المحمودي

انا مش فاهم حاجة ؟

2007-08-31T10:49:00.001-07:00

اية فية اللي بيحصل

مش عارف و الله ما اعرف

المهم اني زي اي شاب عادي

عايز اشتغل و ابقى بني ادم منتج في المجتمع

عايز اكون نفسي و يبقى عندي شقة

و حتة صاجة على اربع عجلات اقلك بلاش الصاجة ام اربع عجلات

عايز احب الناس لقلبي مش يبعد عني

بالعكس يقرب مني

عايز لما اروح اقول بحبك لسندريلا

تقولي و انا كمان

طبعا اللي هيقرا البوست دة بنظرة عامة

يقلك الراجل دة طماع

انا مش طماع

ما هو اللي انت متعرفوش

اني لو في بلد عدله كان كل دة تبقى حقوقي

انا مش معترض و مش عايز اعترض

بس لو ما اتلكمتش هنفجر و لو انفجرت هروح

و هودي اللي حولية

و انا مش عايز كدة

انا بحلم بالخلود

اقلك انت زهقت مني

سلام عليكم

------------------------------

شمس الزناتي

------------------------------

ملحوظة : عشان احنا مدونة عيال بتسيح باسرار شغلها

الاستاذ العندليب انسحب من الكتابة مؤقتا ( السر الاول

المدونة الرائعة في القلب كانت وعدتنا ببوست و لسة مش شايفينته الجمهور هيشمت فينا انصفينا بقى ( السر الثاني

الامل وعدم اليأس

2007-08-30T07:46:00.000-07:00

انا بصراحه مش عارف ابدأ منين الكلام

بس الموضوع وما فيه يحكي عن الامل

يوجد شخص هو في معزه اخويا بلا واكثر

هوفي العقد السابع عشر

وهذه السنه عاني من بعضي المشاكل

وأخطر هذه المشاكل هي عندما جاء بمجموع اقل من المتوقع

وكانت توجد اخطأ وعيوب كثيره منها

عدم فهم النصيحه او سماعها حتي

وكان عندما يوجد من ينصحه او يفهمه اي شئ يتركه ويرحل

وكان من اخطر العيوب ايضأ

الغروروهو الان

يريد في المرحله القادمه مجموع يفوق مجموع المرحله الماضي

بضعفين ما جاء به

ونحن علي اعتاب السنه الدراسيه

وهو الان في ندم وحيره

ويقول هل يوجد امل ام لا

ويريد أرائكم

ماذا يفعل ليحقق ذلك

تحياتي

اسلام

هو ينفع ؟؟؟؟؟

2007-08-28T11:37:00.000-07:00

اولا كدة واجب علينا نهني وحدانية

على مدونتها الجديدة

كلمات في القلب

و نهني التابعي على مدونتة الجديدة

صاحب الحظ السئ

و في الاخر كدة نعلن افتخارنا ان المدونة في القلب بتكتب معانا

------------------

المهم اني هرجع اقول هو ينفع ؟؟؟؟؟

هتقولولي ينفع اية ؟

اقلك زماااااااااااااااان قوي

حصلت حرب كبيرة في الغابة اسفرت عن سقوط ضحايا و موتي

و نجى منها

نسر قلبة مجروح

و فهد فيه جراح في جلدة و لحمه

جراح مش قاتلاه لكن محسسا بالالم

و اسد عجوز فقد عنيه في الحرب

اتعرف الثلاثة على بعض

و حبوا بعض

و عرفوا بعض مواطن قوتهم و ضعفهم

و اتحـــــــــــــــــــــــدوا

و في يوم من الايام

عرفوا ان الغابة كلها في خطر

الانسان المعادي الجاحد داخل ياخد خير الغابة و يطلعه براها

و مع انهم شافوا ان الحرب خسرانه لكن اتحدوا

و حاربوا عشان بيحبوا الغابة دي قوي

الصقراللي قلبه وجع نسي الوجع و حارب

الاسد العجوز الاعمى قاتل بكل كفاح و لو كان لسة اسد شباب و مفتح

الفهد قدر يصبر على الحرب بشراسة متحمل جراحه

مكسبوش الحرب و مخسروهاش

و لسة الحرب مستمرة الثلاثة اجرحوا و جرحهم زادت من الانسان العدو المقتحم للغابة سارقها

عمرهم ما حسوا بالضعف

و كان مع كل امل جديد و فجر جديد تجدد قوتهم

لكن لقيتهم النهاردة بيطلع عليهم فجر جديد و هما بيضعفوا

طب لية سالت عن سر الضعف

عرفت ان الفرقة الثلاثة اتفرقوا

بقى كل واحد بيقاتل في جبهة

و من حبهم في بعض بيقاتلوا بعض على بعض

ما بقتش غابة بقت سرك

يا فهد ينفع الكلام دة

عشان جراحك اقل ما فيهم هتقدر تحارب في الغابة لوحدك

و انت يا صقر قلبك مين يحميه من الموت لو بعدت عنهم

و مين هيحمي الاسد الاعمى

و انت يا اسد ازاي تبيع القضية مبقتش فارقة معاك

اتحاد فرقة نصر هزيمة سبت نفسك للتيار

هو ينفع الصقر و الفهد و الاسد يعتزلوا مناصبهم و يلعبوا دور بلياتشوا فسيرك ؟

ينفع ؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

-------------------------------------------------------------------------

ملحوظة : يا جماعة اللي قرا البوست اللي اتشال كان بيحمل نفس معنى البوست دة

-----------------------------------------------------------------

شمس الزناتي

وصمة عاري

2007-08-27T08:46:00.000-07:00

صديقتي دانة...فلسطينية...أرثيها اليوم....بعد اغتيالها برصاص الإسرائيليين....صديقتي.....لن تكفيك كلماتي...ولا عبراتي....صديقتي....في جنة الخلد أنت

لا زلت أذكرها..عيناها السوداوين

جدائلها الطويلة..ضحكتها الطفولية

لازلت أذكر

مرحنا..ضحكنابكاءنا...آلامناأحلامنا

أحلام كثيرة..ملأت قلوبنا الصغيرة

منذ كنا في الثالثة من عمرنا

حتى أتممنا الثالثة والعشرين

افتقدتها كثيرا....منذ رحيل كل منا إلى وطنها

انقطعت عني أخبارها..لكني لم أيأس

عاهدت نفسي كثيرا بأن أجدها

ثلاثة أعوام متصلة من البحث

إلى أن وجدتها الأسبوع الماضي

حادثتها...سعدت كثيرا بمكالمتي الطويلة

انهمرت دموعنا...صدقا منا

أخبرتني عن موعد زفافها

رفرف قلبي في سماء من السعادة

فهاهي أختي

التي لم تلدها أمي....ستزف...إلى من أحبت

عاهدتها بأن أحضر عرسها

بل...وألبسها ثوبها الأبيض

بيدي...فكأنما هو عرسي أنا...لا عرسها

و منذ لحظات ليست بالكثيرة...أخبرت بزفافها المفاجئ

ارتدت صديقتي ثوبها الأبيض...وزفت...بدوني

إلى سماء رب البرية...عروس طاهرة...نفس زكية

اغتالتها أيد وضيعة....أيد دنيئة

رصاصة واحدة...كانت كفيلة بالرحيل

ما ذنبها....؟

ماذا اقترفت...؟

و إن اقترفت جرما....أتستحق عليه القتل غدرا...؟

لم يغمض لي جفن منذ أتاني النبأ

غضب عارم يعتريني

يعصف بكياني

يهزه هزا عنيفا

تنتفض روحي من فرط حنقي

فهاهم يعاودون عبثهم

و ها نحن نعاود صمتنا

صمت حقير...صمت تشمئز منه نفوسنا

صمت

تنكره قلوبنا...و لا نملك إلا دموعنا

صديقتي

لن تكفيك دموعي....وإن انهمرت عليك العمر كله

صديقتي

لا....لن أبكيك

فشهيدة أنت

و ذليلة أنا

رحلت عني رفيقة الطفولة والصب

ارحلت....تركتني وحيدة

لأجابه الآلام وحدي

لن تفارق صورتها خيالي

كما الدرةنعم...كما الدرة

ياللمفارقة

دانة هي...ودرة هو

كلاهما فلسطيني

كلاهما مغدور به

كلاهما مجروح القلب الآن

فقد أهدرنا دمهما بأيدينا

بذلتنا

بصمتنا...الذي هو وصمة عارنا
منى المحمودي
4\6\2007

قصيدة

2007-08-27T04:28:00.000-07:00

ياجماعة اسمحولي اعبر عن رأيي بقصيدة صغيرة اسمها (اصحوا ياعرب )
اصحوا ياعرب
النهاردة الصبح قايم على نشرة الاخبار
على طفل برئ بيصرخ وبيتضرب بالنار
وشاب زي الورد على الرصيف دمه سايح
وأم شدة راسها على الحبيب اللي رايح
قلت مين قالوا فلسطين
ساعتها بكت عيني على الحق اللي رايح
على الدم اللي سايح
اصحوا ياعرب
القدس بتناديكم سيبوا افراح ناديكم
شيلوا الخوف من قلوبكم والضلمة من عنيكم
سلام مفيش سلام مع أعداء البشر
بيردوا بالرصاص على طفل معاه حجر
صلاح الدين تعالى ياقاهر الصلبيين
ياقطز يابن عمي هما دول التتاريين
اصحوا ياعرب
عايزين قطز جديد يضرب بايد حديد
يمحي مايخاف وعيد يرفع راية العرب

اصحوا ياعرب

نسينا

2007-08-25T04:34:00.000-07:00

بسم الله الرحمن الرحيم

أول بوست ليا معاكم

هفكركم بحاجة

إهانة الرسول صلى الله عليه وسلم

إمبارح

كنت في السوبرماركت

حبيت أبدل نوع من أنواع الجبنة بنوع مصري

الكاشير قاللي يا فندم دي أنضف

قلتله بس دانماركي...مقاطعة

ضحك من قلبه وقالي : إنتي لسه فاكرة

إحنا نسينا

يا خبر أبيض

نسينا ؟؟؟؟

إزاي نسينا

مش قادرة أفهم

نسينا إيه أصلا ؟؟؟؟

ماهو اللي إحنا فيه ده

هو اللي خلى شوية ناس زي دول يتطاولوا

على سيد البرية

عشان نسينا

تجاهلنا

كل واحد قال ما فرقتش على 2 جنيه

و ال2 بقوا 7 و بعد كده 38

عشان نسينا

!!!!!!!!!!!

ده إحنا عندنا في الصعيد اللي يرشنا بالمية

بنرشه بالدم

و تار بأى وليلة

نسينا إزاي تارنا بسهولة ؟

نشف دمنا جوانا ؟

و لا خلص....؟

إخص.....ألف مليون إخص....علينا

منى المحمودي

كلامنا مش كلام عيال

2007-08-24T18:04:00.000-07:00

بعد لما صاحبي وحبيبي شمس قدم المدونة الجديدة للناس

لاحظت أن كل التعليقات جاية على أن كلامنا هيكون كلام عيال بجد

وإننا كمان في حضانة

عموماً أنا موافق على المبدأ وأحترم جداً أراء الناس وبقبل النقد كمان

بس تعالوا بينا بقى نشوف أنا هتكلم كلام عيال ولا لا ؟؟؟

قريت كتير أوي أن فيه حملة لمكافحة التدخين وحملة كمان لمكافحة المخدرات

بس بقى اللي عمري ما شفته ولا سمعته هو

حملة لمكافحة الشباب الفاشلين في مصر

وبث الأمل في نفوسهم للحياة من جديد

وبقصد بكلامي كل شاب مات جواه الأمل

وفقد كمان الثقة في نفسه وفي اللي حواليه كمان

وأصبح مفيش قدامه إلا حاجتين

الأولي هي القاعدة على القهاوي

والتانية بقى إنه يدور على المخدرات والهلس بأي شكل

بس بقى يا غلابة مفيش معاهم اللي يقعدهم على القهوة

ولا فيه معاهم كمان اللي يشتروا بيه مخدرات

طيب وإيه العمل بقى دلوقتي ؟؟؟؟

قالوا مجموعة منهم إحنا نسرق علشان نظبط الدنيا

وقالوا مجموعة تانية إحنا نقضيها أي حاجة في أي حاجة وأهو اسمنا شغالين

وفي الحالتين المهم أنهم يجيبوا الفلوس اللي تخليهم يقضوا يومهم

ويجيبوا مخدراتهم كمان

المجموعة الأولي كده كده مصيرهم السجن لأن ده جزاتهم

ومش لازم يحسوا بالحياة الكريمة من الأصل

لأنهم عمرهم ما حسوا بالنعمة اللي هما فيها

أما بقى بالنسبة للمجموعة التانية

لما تيجي تسأل أي حد فيهم عن حاله

يرد ويقولك أنا شغال شغلانة مؤقتة كده لحد لما أظبط نفسي وألاقي شغل دائم

طيب بقى يا عم الأمور منك له .. له .. له .. فين

حياتك ........... وفين كمان

مستقبلك .............. وفين كمان

طموحك ................ وفين كمان

العيشة الكريمة اللي بتتمناها

فين بقى كل ده

يرد عليك ويقولك ما هو ظروف البلد كده

وأنا أعمل إيه مش لاقي شغل خالص

هههههههههههههههههههههههههههههه

والنبي بقى ده كلام يطلع من شاب طموح أو عايز يبقى حاجة

أكيد أكيد من الفاشلين طبعاً

فاكرني كده خلصت كلامي ؟؟؟؟

أنا كده خلصت ............................... لا لسه شوية

تلاقي الواحد من دول كمان يأخد ناس تانية معاه

ناس مش دي حياتهم ولا ده كيانهم ولا دي كمان تربيتهم

ويجروهم لسكة الفشل علشان يبقوا زيهم من كل إتجاه

وعلى سبيل المثال طبعاً

يقولوا يلا بينا بقى نقضيها ونسهر سهرة حلوة ونضرب سيجارتين كمان

أو يا مزاجه بقى لو إزازتين بيرة معاهم علشان نعيش الحياة ونتعامل

ودي البداية بس

والتاني المغفل كمان يروح معاه في نفس التيار ويطاوعه في كل اللي يقوله

ولا كأن عنده دماغ .............مجرد آلة بس تنفذ اللي بيتقال

مش كده وبس ده كمان بيبرر لنفسه إن اللي بيعمله ده مش غلط

لأن ظروفه مخبطة شوية اليومين دول وتعبان في شغله

أو تعبان أنه بيدور على شغل

أو تعبان لأن عنده شوية مشاكل في البيت أو شوية مشاكل مع خطيبته

وفي كمان بعض منهم يتحجج ويقولك أصل نفسيتي تعبانة اليومين دول

والنبي ده كلام

أما صاحبنا التاني بقى فمصدق

أهو واحد يشاركه في فساده وفي حياته الفاشلة

تقول إيه بقى ولا تعمل إيه ؟؟

وغيره من ده كتير ولو أنا كملت كلامي يبقى هكتب للصبح

المشكلة بقت مشكلة شباب كتير أوي مش واحد ولا اتنين

ولووقفنا محلك سر كده يبقى بقى عليه العوض في بقيت الشباب

كل ده بقى بسبب

إن أهالينا الله يكون في عونهم هيلاحقوا على إيه ولا إيه

المشكلة فينا إحنا ومن جوانا مش من أهالينا أو البيئة المحيطة بأي حد فينا

المشكلة بقى في

إننا مهتمين بحاجات كتيرة إهتمام فوق الوصف

وممكن الحاجات دي تكون بسيطة جداً أو تافهة كمان

ولكن على الجانب التاني

مهملين جداً في حاجات تانية إهمال جسيم

مع إن ممكن الحاجات دي تبقى أهم كتير من الحاجات التانية

مش بس كده لا وليها الأولوية كمان في تنفيذها أو حلها

وكل ده بسبب إننا مش حاسين بحجم المشاكل اللي حوالينا أد إيه ؟؟؟

أو إهمالنا لبعض الحاجات ممكن توصلنا لفين ؟؟؟

محتاجين وعي للشباب الفاشل علشان يبدأ يحلم من جديد

وكمان وعي للشباب الواعي علشان ينضج ويكبر وده شيء أكيد

معلش بقى أنا طولت في كلامي شوية

بس يا ترى بقى كلامي كلام عيال ولا إيه ؟؟؟

NOSHA

الحضانه دي

2007-08-22T08:28:00.000-07:00

احمممم احممم

يا اهل الدار

يا عم الزاير يا اللي جاي تبارك على المدونة الجديدة

ايوة سامعني

تمام يعني

طب تمام

بسم الله الرحمن الرحيم

هما كلمتين و هقصر فيهم و الله عشان

اللي مش بيحب يقرا كتير

زي ما قلتلكوا فوق

طبعا انتوا عارفين لا عتب على المجنون و لا السكران و لا المحشش و لا العيل

و لأن احنا مينفعش نبقى مجانين و لا محششين و لا سكرانين

يبقى خالينا عيال احسن و هنتكلم براحتنا و لا عيب علينا

و لا عتب علينا و هنقول كل اللي جوانا

طبعا احنا هنا عشان عيال بقى معندناش مبدء التخصص اي عضو بيكتب في اي حاجة

يعني هتلاقونا بنهييس على الاخر بس عادي

انا مش هحكيلكوا عن كل شخصية بس هديكوا نبذة

نوشة

طول النهار مع بعض يقلي انا مش معاهم و انا اقله انا مش معاهم

التـــــــــــــــــــــــــــــــــــــــــابعي

داخل التدوين طازة و الله

هو شم رحته عند تاسيس مدونة انا مش معاهم بس تقريبا كات الريحة

جامدة شوية فساب التدوين و رجع دلوقتي اه على فكرة دى المقالة الوحيدة اللي كتبها

حكاية شاب مخنوق

الحمد لله بعد ما الخنقة راحت رجعلنا

اســـــــــــــــــــــــــــلام

دة اسمه الحقيقي صديق حميم جدا و سمع عن عالم التدوين كتير

و قال يجرب سامحني يا عم اسلام بقى اني قلت اسمك الحقيقي

بس اعملك اية بعتلك الدعوة و انت لسة مجتش