قضية راي عام
هذا المسلسل الذي نتمتع جميعا بمشاهدته طوال شهر رمضان
و الذي كان مثار احاديث كثيرة
حتى اني وجدت المدونة
كاتبة عنه بوست قريب
و الناس كلها مش عاجبها المسلسل و اللي بيطالب بمقاطعته
مع اني شايف الموضوع غير كدة
معلش سامحوني اصل اصحابي بيقولوا علية فزلوكة شوية
يا جماعة الموضوع ان الكاتب حسن الجلاد
اللي انا ما اعرفوش و لا عمري شفته
و مش بدافع عنه عشان اداني 10 جنية
الراجل دة مش بيقول ان دي مصر
ابدا
انا متأكد ان مصر عمر ما هيبقى فيها ابن وزير يتسجن و لا ابن صول حتى
على راي نوارة
بس انا شايف ان محسن الجلاد
عايز يقول اني نفسه تبقى دي مصر
نفسه يلاقي الشرطة اللي بتنفذ القانون بروح القانون
نفسة يشوف وكيل النيابة اللي بيتحدى السلطة الغاشمة من اجل اظهار الحق
نفسه يشوف الاسرة المصرية بتطالب برجوع الحق لاصحابة مش بان المظلوم يسكت عن حقة
الراجل يا جماعة نفسه دة يحصل
و لما قال ان دي قصة و الناس افترضت انها هتحصل في مصر
مقلش ان دة بيحصل
لكن خيالة صورلة ان ربنا يهدي العاصي و كل واحد يراعي ضميره في شغله
بس كدة
دول كانوا كلمتين على الماشي
فكروني المرة الجاية في قصيدة شعر عايز اكتبها بقاي كتير و بنسى
و السلام ختام يا احسن جدعان
--------------------------------------------------------------------------------------
ملحوظة لفريق كلام عيال : انتوا عارفين انا بحب السياحة فملاحيظي بقولها على الملئ
تم ارسال دعوة لكل من المدونة ايناس الفكر السجين و المدونة بطة بكر للمشاركة في كلام عيال و مستنى رايكم
---------------------
شمس الزناتي
-------------------
19 comments:
الصراحه الكلام اللى بتقوله ده او الاحلام اللى بتتقال دى مستحيله
حاليا كل واحد فى ايده سُلطه
بيستخدمها لمصلحته الشخصيه
كانوا زمان بيقولوا الشرطه فى خدمه الشعب انهارده الشرطه بتبهدل الشعب
وعايزهم يقوموا بواجبهم صح
كل واحد انهارده بيفكر فى نفسه وعمر البلد دى ماهتتصلح او اى بلد تانيه من غير معجزة من عند ربنا سبحانه وتعالى
رمضان كريم
والله يا شمس
انا لا أستبعد ان الى كتب المسلسل ده
ظابط فى أمن دولة
والى اخرجه جمال عيد محامى إسلاك نبيه
كده يا شمس ؟
هو ده ينفع ؟
دهانا كنت مستنى المسلسل يخلص و انتقده و اقول عيوبه الكتييييييييييير و مميزاته
بس انت كده حرقت لى الموضوع
والله يا عم شمس انا محصليش الشرف ولا شفت المسلسل , بس إحساسي بيقولي أن مؤلفي مسلسلات رمضان السنادى عملين مع بعضيهم زى مظاهره كدة بتدافع عن الشرطة في مصر
يعني في مسلسل حمادة عزو , يا عيني الواد إللي كان بيتظاهر وخارب الدنيا راح الظابط "خير اللهم أجعله خير" بيشغلوا في مجلة من المجلات القومية , وإيه كمان بيجبلوا عربية " يعني زي ما يكون يوسف معاطي المؤلف بيقول "كخ عليك يا شعب " أنتوا بتتهموا الشرطة عالفاضي.
على العموم يا عم شمس
مسلسل يفوت ولا حد يموت
حمادة زيدان
نسيت يا معلم
أدخل مدونتي , وأول بوست عندك , هاتلاقي قصتي الجديدة
عاوزك تشوفها
وتقولي رأيك فيها وبصراحة
حمادة زيدان
السلام عليكم ورحمة الله وبركاته
انا مش متابعة المسلسل والله يا شمس بس انا شفت منه كام حلقة كده
وطالما دا هدف الكاتب يبقى كتر خيره والراجل يشكر
تحياتى يا شمس
ادعلنا الدش بتاعنا يتصلح عشان نشوف المسلسل
هتبقي ديه مصر ياشمس
صدقني
هتبقي
ان كان حلم النهاردة ان ابن الوزير يتحبس او يتسجن
قريب قوي هيتحبس ابن الريس كمان
ان اخطا
ماتقولش عليا مجنونة
انا عاقلة جدااا
لا انا في قمة العقل
هتقولي ازاي
هقولك لان خلاص
مابقناش زي زمان
عقدة الكلام الي كانت عندنا بدات تتفك
صحيح بيحاولوا يكممومها تاني بحبس صحفيين واعتقالات وووو
لكنهم بيحلموا
ازاي بعد مابقي في نفس
عاوزين ياخدوا مننا تاني
ينسوا
وهتشوفوا
بكرة المصري
هيعمل ايه
بس يقول بس
هعمل حاجة
دينا حامد
المعجزة هتيجي بايد ربنا ايوة
بس ربنا مش هينزل شهاب النار من السماء ربنا هيبعت المعجزة على ادينا
منذر
اتن متغاظ اوي من المسلسل شكلك بيقول كدة
محمد مارو
لا و لا يهمك ما اتحرقش اكتب انت بس و احنا في الانتظار
حمادة زيدان
النفاق دة شئ طبيعي في الاعلام مش جديد علينا
حمادة زيدان
ايوة يا حمادة جاي اهو
Hadota .. حدوتة
يارب يا حدوته الدش بتاعكوا يتصلح يارب
بنت الاسلام
بيعجبني فيكي يا بطوط التفائل
ههههههههه
شوف منذر بيقولك اللى كتب المسلسل ده ظابط فى امن الدولة
هههههههههه
تقريبا القصة دى اول قصة يكتبها وزير
هههههههههه
بوست جميل
تحياتى
والله يا شمس انا بلمح كل كام يوم حتة من المسلسل كده وبكون واخدة برشمتين مسكن و6 كوباية نسكافية علشان اقعد مع اللى بيشفوه عندى فى البيت -انا شايفة ان المسلسل بيطبطب على رجال الشرطة اللى افعالهم بهدلتهم وفضايحهم كترت
يعنى وزارة الاعلام بتهدى وزارة الداخلية
مسلسل لعله يعمل دعاية لهم
و يرسم لهم صورة جديدة فى عيون
عيون مين
مش عارفة
والف تحية لك
الله يا شمس أنا مش متابعه أى مسلسل عامله قطيعه معاهم عشان بحس ان حياتنا بيصوروها على انها صويت و بكاء و خيانه زوجيه مع السكرتيره يا خلاف على أرث أو أى حاجه نكد
و العمليه مش ناقصه بحب أشوف حجات تفرح يا أما فيها فكره جديده مبهره
شمس
هو محتاج ربنا والشعب لحل المشكله ده
ده لو حصل بجد واتهم ابن وزير هيخرج زي الشعر من العجين
ويمكن يضحو بواحد ويحبسوه مكانه
او ده ميحصلش
بس في الاخر احب اقلك ان احنا في زمن الكوسه والسلطه
هو فعلا حلم
اقرب للفانتازيا او الخيال العلمى
لكن الحلم هو اللى فاضلنا
وعلى رأى الملك
لو بطلنا نحلم نموت
Post a Comment